א לַֽמְנַצֵּחַ אֶל־הַנְּחִילוֹת מִזְמוֹר לְדָוִֽד
: ב אֲמָרַי הַֽאֲזִינָה | יְהֹוָה בִּינָה הֲגִֽיגִי
: ג הַקְשִׁיבָה לְקוֹל שַׁוְעִי מַלְכִּי וֵאלֹהָי כִּֽי־אֵלֶיךָ אֶתְפַּלָּֽל
: ד יְֽהוָה בֹּקֶר תִּשְׁמַע קוֹלִי בֹּקֶר אֶֽעֱרָךְ־לְךָ וַֽאֲצַפֶּֽה
: ה כִּי | לֹא אֵל חָפֵץ רֶשַׁע | אָתָּה לֹא יְגֻרְךָ רָֽע
: ו לֹֽא־יִתְיַצְּבוּ הֽוֹלְלִים לְנֶגֶד עֵינֶיךָ שָׂנֵאתָ כָּל־פֹּֽעֲלֵי אָֽוֶן
: ז תְּאַבֵּד דֹּבְרֵי כָזָב אִישׁ־דָּמִים וּמִרְמָה יְתָעֵב | יְהֹוָֽה
: ח וַֽאֲנִי בְּרֹב חַסְדְּךָ אָבוֹא בֵיתֶךָ אֶשְׁתַּֽחֲוֶה אֶל־הֵיכַל קָדְשְׁךָ בְּיִרְאָתֶֽךָ
: ט יְהֹוָה | נְחֵנִי בְצִדְקָתֶךָ לְמַעַן שׁוֹרְרָי הַוְשַׁר [הַיְשַׁר] לְפָנַי דַּרְכֶּֽךָ
: י כִּי אֵין בְּפִיהוּ נְֽכוֹנָה קִרְבָּם הַוּוֹת קֶֽבֶר־פָּתוּחַ גְּרוֹנָם לְשׁוֹנָם יַֽחֲלִֽיקוּן
: יא הַֽאֲשִׁימֵם | אֱֽלֹהִים יִפְּלוּ מִמֹּֽעֲצוֹתֵיהֶם בְּרֹב פִּשְׁעֵיהֶם הַדִּיחֵמוֹ כִּי מָרוּ בָֽךְ
: יב וְיִשְׂמְחוּ כָל־חוֹסֵי בָךְ לְעוֹלָם יְרַנֵּנוּ וְתָסֵךְ עָלֵימוֹ וְֽיַעְלְצוּ בְךָ אֹֽהֲבֵי שְׁמֶֽךָ
: יג כִּֽי־אַתָּה תְּבָרֵךְ צַדִּיק יְהֹוָה כַּצִּנָּה רָצוֹן תַּעְטְרֶֽנּוּ
: