פרק כו
א לְדָוִד | שָׁפְטֵנִי יְהֹוָה כִּֽי־אֲנִי בְּתֻמִּי הָלַכְתִּי וּבַיהֹוָה בָּטַחְתִּי לֹא אֶמְעָֽד
: ב בְּחָנֵנִי יְהֹוָה וְנַסֵּנִי צָרְופָה [צָרְפָה] כִלְיוֹתַי וְלִבִּֽי
: ג כִּֽי־חַסְדְּךָ לְנֶגֶד עֵינָי וְהִתְהַלַּכְתִּי בַּֽאֲמִתֶּֽךָ
: ד לֹא־יָשַׁבְתִּי עִם־מְתֵי־שָׁוְא וְעִם־נַֽעֲלָמִים לֹא אָבֽוֹא
: ה שָׂנֵֽאתִי קְהַל מְרֵעִים וְעִם־רְשָׁעִים לֹא אֵשֵֽׁב
: ו אֶרְחַץ בְּנִקָּיוֹן כַּפָּי וַֽאֲסֹבְבָה אֶת־מִזְבַּֽחֲךָ יְהֹוָֽה
: ז לַשְׁמִעַ בְּקוֹל תּוֹדָה וּלְסַפֵּר כָּל־נִפְלְאוֹתֶֽיךָ
: ח יְֽהוָה אָהַבְתִּי מְעוֹן בֵּיתֶךָ וּמְקוֹם מִשְׁכַּן כְּבוֹדֶֽךָ
: ט אַל־תֶּאֱסֹף עִם־חַטָּאִים נַפְשִׁי וְעִם־אַנְשֵׁי דָמִים חַיָּֽי
: י אֲשֶׁר־בִּידֵיהֶם זִמָּה וִֽימִינָם מָלְאָה שֹּֽׁחַד
: יא וַֽאֲנִי בְּתֻמִּי אֵלֵךְ פְּדֵנִי וְחָנֵּֽנִי
: יב רַגְלִי עָֽמְדָה בְמִישׁוֹר בְּמַקְהֵלִים אֲבָרֵךְ יְהֹוָֽה
: