א לָמָה יְהֹוָה תַּֽעֲמֹד בְּרָחוֹק תַּעְלִים לְעִתּוֹת בַּצָּֽרָה
: ב בְּגַֽאֲוַת־רָשָׁע יִדְלַק עָנִי יִתָּפְשׂוּ | בִּמְזִמּוֹת זוּ חָשָֽׁבוּ
: ג כִּֽי־הִלֵּל רָשָׁע עַל־תַּֽאֲוַת נַפְשׁוֹ וּבֹצֵעַ בֵּרֵךְ נִאֵץ | יְהֹוָֽה
: ד רָשָׁע כְּגֹבַהּ אַפּוֹ בַּל־יִדְרשׁ אֵין אֱלֹהִים כָּל־מְזִמּוֹתָֽיו
: ה יָחִילוּ דְרָכָו| [דְרָכָיו] | בְּכָל־עֵת מָרוֹם מִשְׁפָּטֶיךָ מִנֶּגְדּוֹ כָּל־צוֹרְרָיו יָפִיחַ בָּהֶֽם
: ו אָמַר בְּלִבּוֹ בַּל־אֶמּוֹט לְדֹר וָדֹר אֲשֶׁר לֹֽא־בְרָֽע
: ז אָלָה פִּיהוּ מָלֵא וּמִרְמוֹת וָתֹךְ תַּחַת לְשׁוֹנוֹ עָמָל וָאָֽוֶן
: ח יֵשֵׁב | בְּמַאְרַב חֲצֵרִים בַּמִּסְתָּרִים יַֽהֲרֹג נָקִי עֵינָיו לְֽחֵֽלְכָה יִצְפֹּֽנוּ
: ט יֶאֱרֹב בַּמִּסְתָּר | כְּאַרְיֵה בְסֻכֹּה יֶאֱרֹב לַֽחֲטוֹף עָנִי יַחְטֹף עָנִי בְּמָשְׁכוֹ בְרִשְׁתּֽוֹ
: י וִדְכֶּה [יִדְכֶּה] יָשֹׁחַ וְנָפַל בַּֽעֲצוּמָיו חֵלכָּאִֽים [חֵיל כָּאִֽים]
: יא אָמַר בְּלִבּוֹ שָׁכַֽח אֵל הִסְתִּיר פָּנָיו בַּל־רָאָה לָנֶֽצַח
: יב קוּמָה יְהֹוָה אֵל נְשָׂא יָדֶךָ אַל־תִּשְׁכַּח עֲֽנָיִֽים [עֲֽנָוִֽים]
: יג עַל־מֶה | נִאֵץ רָשָׁע | אֱלֹהִים אָמַר בְּלִבּוֹ לֹא תִּדְרֽשׁ
: יד רָאִתָה כִּֽי־אַתָּה | עָמָל וָכַעַס | תַּבִּיט לָתֵת בְּיָדֶךָ עָלֶיךָ יַֽעֲזֹב חֵֽלֶכָה יָתוֹם אַתָּה | הָיִיתָ עוֹזֵֽר
: טו שְׁבֹר זְרוֹעַ רָשָׁע וָרָע תִּדְרֽוֹשׁ־רִשְׁעוֹ בַל־תִּמְצָֽא
: טז יְהֹוָה מֶלֶךְ עוֹלָם וָעֶד אָבְדוּ גוֹיִם מֵֽאַרְצֽוֹ
: יז תַּֽאֲוַת עֲנָוִים שָׁמַעְתָּ יְהֹוָה תָּכִין לִבָּם תַּקְשִׁיב אָזְנֶֽךָ
: יח לִשְׁפֹּט יָתוֹם וָדָךְ בַּל־יוֹסִיף עוֹד לַֽעֲרֹץ אֱנוֹשׁ מִן־הָאָֽרֶץ
: