תהלים פרק סד - 64
א לַֽמְנַצֵּחַ מִזְמוֹר לְדָוִֽד
: ב שְׁמַע אֱלֹהִים קוֹלִי בְשִׂיחִי מִפַּחַד אוֹיֵב תִּצֹּר חַיָּֽי
: ג תַּסְתִּירֵנִי מִסּוֹד מְרֵעִים מֵרִגְשַׁת פֹּֽעֲלֵי אָֽוֶן
: ד אֲשֶׁר שָׁנְנוּ כַחֶרֶב לְשׁוֹנָם דָּרְכוּ חִצָּם דָּבָר מָֽר
: ה לִירוֹת בַּמִּסְתָּרִים תָּם פִּתְאֹם יֹרֻהוּ וְלֹא יִירָֽאוּ
: ו יְחַזְּקוּ־לָמוֹ | דָּבָר רָע יְֽסַפְּרוּ לִטְמוֹן מוֹקְשִׁים אָמְרוּ מִי יִרְאֶה־לָּֽמוֹ
: ז יַחְפְּשׂוּ עוֹלֹת תַּמְנוּ חֵפֶשׂ מְחֻפָּשׂ וְקֶרֶב אִישׁ וְלֵב עָמֹֽק
: ח וַיֹּרֵם אֱלֹהִים חֵץ פִּתְאוֹם הָיוּ מַכּוֹתָֽם
: ט וַיַּכְשִׁילֻהוּ עָלֵימוֹ לְשׁוֹנָם יִתְנֽוֹדֲדוּ כָּל־רֹאֵה בָֽם
: י וַיִּֽירְאוּ כָּל־אָדָם וַיַּגִּידוּ פֹּעַל אֱלֹהִים וּמַֽעֲשֵׂהוּ הִשְׂכִּֽילוּ
: יא יִשְׂמַח צַדִּיק בַּיהֹוָה וְחָסָה בוֹ וְיִֽתְהַֽלְלוּ כָּל־יִשְׁרֵי־לֵֽב
: