א לַֽמְנַצֵּחַ בִּנְגִינוֹת עַֽל־הַשְּׁמִינִית מִזְמוֹר לְדָוִֽד
: ב יְֽהוָה אַל־בְּאַפְּךָ תוֹכִיחֵנִי וְֽאַל־בַּֽחֲמָֽתְךָ תְיַסְּרֵֽנִי
: ג חָנֵּנִי יְהֹוָה כִּי אֻמְלַל אָנִי רְפָאֵנִי יְהֹוָה כִּי נִבְֽהֲלוּ עֲצָמָֽי
: ד וְנַפְשִׁי נִבְֽהֲלָה מְאֹד וְאַתָּ [וְאַתָּה] יְהֹוָה עַד־מָתָֽי
: ה שׁוּבָה יְהֹוָה חַלְּצָה נַפְשִׁי הוֹשִׁיעֵנִי לְמַעַן חַסְדֶּֽךָ
: ו כִּי אֵין בַּמָּוֶת זִכְרֶךָ בִּשְׁאוֹל מִי יֽוֹדֶה־לָּֽךְ
: ז יָגַעְתִּי בְּֽאַנְחָתִי אַשְׂחֶה בְכָל־לַיְלָה מִטָּתִי בְּדִמְעָתִי עַרְשִׂי אַמְסֶֽה
: ח עָֽשְׁשָׁה מִכַּעַס עֵינִי עָֽתְקָה בְּכָל־צוֹרְרָֽי
: ט סוּרוּ מִמֶּנִּי כָּל־פֹּֽעֲלֵי אָוֶן כִּֽי־שָׁמַע יְהֹוָה קוֹל בִּכְיִֽי
: י שָׁמַע יְהֹוָה תְּחִנָּתִי יְהֹוָה תְּֽפִלָּתִי יִקָּֽח
: יא יֵבשׁוּ וְיִבָּֽהֲלוּ מְאֹד כָּל־אֹיְבָי יָשֻׁבוּ יֵבשׁוּ רָֽגַע
: