א מִזְמוֹר לְדָוִד בְּבָרְחוֹ מִפְּנֵי | אַבְשָׁלוֹם בְּנֽוֹ
: ב יְהֹוָה מָה־רַבּוּ צָרָי רַבִּים קָמִים עָלָֽי
: ג רַבִּים אֹמְרִים לְנַפְשִׁי אֵין יְֽשׁוּעָתָה לּוֹ בֵֽאלֹהִים סֶֽלָה
: ד וְאַתָּה יְהֹוָה מָגֵן בַּֽעֲדִי כְּבוֹדִי וּמֵרִים רֹאשִֽׁי
: ה קוֹלִי אֶל־יְהֹוָה אֶקְרָא וַיַּֽעֲנֵנִי מֵהַר קָדְשׁוֹ סֶֽלָה
: ו אֲנִי שָׁכַבְתִּי וָֽאִישָׁנָה הֱקִיצוֹתִי כִּי יְהֹוָה יִסְמְכֵֽנִי
: ז לֹֽא־אִירָא מֵרִֽבְבוֹת עָם אֲשֶׁר סָבִיב שָׁתוּ עָלָֽי
: ח קוּמָה יְהֹוָה | הוֹשִׁיעֵנִי אֱלֹהַי כִּֽי־הִכִּיתָ אֶת־כָּל־אֹיְבַי לֶחִי שִׁנֵּי רְשָׁעִים שִׁבַּֽרְתָּ
: ט לַיהֹוָה הַיְשׁוּעָה עַל־עַמְּךָ בִרְכָתֶךָ סֶּֽלָה