פרק יט
א לַֽמְנַצֵּחַ מִזְמוֹר לְדָוִֽד
: ב הַשָּׁמַיִם מְֽסַפְּרִים כְּבֽוֹד־אֵל וּמַֽעֲשֵׂה יָדָיו מַגִּיד הָרָקִֽיעַ
: ג יוֹם לְיוֹם יַבִּיעַ אֹמֶר וְלַיְלָה לְּלַיְלָה יְחַוֶּה־דָּֽעַת
: ד אֵין אֹמֶר וְאֵין דְּבָרִים בְּלִי נִשְׁמָע קוֹלָֽם
: ה בְּכָל־הָאָרֶץ | יָצָא קַוָּם וּבִקְצֵה תֵבֵֽל מִלֵּיהֶם לַשֶּׁמֶשׁ שָׂם אֹהֶל בָּהֶֽם
: ו וְהוּא כְּחָתָן יֹצֵא מֵחֻפָּתוֹ יָשִׂישׂ כְּגִבּוֹר לָרוּץ אֹֽרַח
: ז מִקְצֵה הַשָּׁמַיִם | מֽוֹצָאוֹ וּתְקוּפָתוֹ עַל־קְצוֹתָם וְאֵין נִסְתָּר מֵֽחַמָּתֽוֹ
: ח תּוֹרַת יְהֹוָה תְּמִימָה מְשִׁיבַת נָפֶשׁ עֵדוּת יְהֹוָה נֶאֱמָנָה מַחְכִּימַת פֶּֽתִי
: ט פִּקּוּדֵי יְהֹוָה יְשָׁרִים מְשַׂמְּחֵי־לֵב מִצְוַת יְהֹוָה בָּרָה מְאִירַת עֵינָֽיִם
: י יִרְאַת יְהֹוָה | טְהוֹרָה עוֹמֶדֶת לָעַד מִשְׁפְּטֵֽי־יְהֹוָה אֱמֶת צָֽדְקוּ יַחְדָּֽו
: יא הַנֶּחֱמָדִים מִזָּהָב וּמִפָּז רָב וּמְתוּקִים מִדְּבַשׁ וְנֹפֶת צוּפִֽים
: יב גַּם־עַבְדְּךָ נִזְהָר בָּהֶם בְּשָׁמְרָם עֵקֶב רָֽב
: יג שְׁגִיאוֹת מִֽי־יָבִין מִנִּסְתָּרוֹת נַקֵּֽנִי
: יד גַּם מִזֵּדִים | חֲשׂךְ עַבְדֶּךָ אַל־יִמְשְׁלוּ־בִי אָז אֵיתָם וְנִקֵּיתִי מִפֶּשַֽׁע רָֽב
: טו יִֽהְיוּ לְרָצוֹן | אִמְרֵי־פִי וְהֶגְיוֹן לִבִּי לְפָנֶיךָ יְהֹוָה צוּרִי וְגֹֽאֲלִֽי
: